Descripcíon
“¿Qué yera aquello? Tenía una forma que nun yera a describir, como la cuadratura´l círculu, nun sé, nun s´asemeyaba a nada que tuviera visto enantes. Y el color… tampoco diba saber dicir cuálu yera, namás que yera escuru como´l fondu una cueva, pero ensin ser prietu”. Con estes pallabres entama a describir Solinca Turbón a La mole, una xigantesca nave espacial qu’alluga nel cielu de la ciudá, de cualesquier ciudá del norte. Too pasa a tou meter y nun tris un exércitu d’estraterrestres percuerre les cais chuquinando xente, nun hai salida… o sí, tirase al monte. Con esti argumentu constrúi l’autora una de les hestories del llibru de cuentos Coses rares. Son estos cuentos pa xente mozo y non tanto, qu’enganchen, caltienen l’interés y regalen dellos finales ablucantes. Too nuna prosa llimpia, de ritmu áxil, con un asturianu perfechu y un dominiu de la oralidá y los personaxes qu’aporta frescura y veracidá a les hestories.
