Descripcíon
—Oyimos esto va venti minutos —dixo’l capitán Gradenko de la que facía una seña al segundu oficial pa que reproduxere’l soníu que recibiere’l sistema d’escucha.
El primer oficial calcó unos botones y un soníu estrañu y desagradable invadió la sala. Dellos tripulantes torcieron la cara, otros respigáronse. Nengún paecía tar cómodu con aquel ruíu que nun s’asemeyaba a nada qu’oyeren nunca.
—¿Qué ye? —entrugó’l capitán a Olaya y Miḥail.
—Nun lo sé —dixo Miḥail —Si ye un barcu, nin lu sentí nunca nin recuerdo que sonare asina nada que me dieren en nenguna de les llistes de l’academia naval..
—Nun paez un barcu —dixo’l capitán faciendo que reproduxeren el soníu otra vez —Pero nun ye un animal, ¿Verdá? —entrugó-y a Olaya.
Olaya esta segunda vegada que sintieron el soníu creyó oyer dalgo nél. Una especie de “déjà vu” auditivu, un “déjà entendu”. Pero… ¿Ónde lu oyiría? Nun tenía nin idea. Tampoco ye que-y resultare familiar.
—Nun lo paez, señor —dixo Olaya seria. Duldó. —Anque tampoco ye dalgo qu’escataría dafechu. Pensó na güela, allá na so colomina y nel mieu que-y daría sentir daqué asemeyao.
