Autor
Andrés Fernández
Nacíu nel añu 2003 creció nel conceyu Morcín, onde sigue viviendo anguaño. Tres cursar el bachiller d’Humanidaes nel IES Aramo entró a la Universidá d’Uviéu esti mesmu añu, cursando la carrera d’Estudios Clásicos y Románicos. L’autor collabora davezu cola revista dixital Refuelgu, na qu’espubliza artículos bien lliterarios o bien venceyaos a Asturies y la so hestoria; amás, el periódicu xixonés El Comercio espublizó-y tres rellatos hasta la fecha na seición Alitar Asturies: “Plomu y Sangre”, a fecha 26 de mayu de 2020, “Suaños Rotos”, el 6 d’abril del añu corriente y finalmente “Monólogu d’una ponte en tiempos de guerra”, esi 19 d’ochobre. Amás, en 2021 ganó’l IV Concursu de Rellatos de Morcín en categoría xuvenil con un rellatu de fantasía épica que lleva por nome “El Cantar de Suaro Caínez”.
En 2022 asoleyó con Ediciones Radagast la so primer novela “1809: Cartes de la Revolución de Trubia”; una novela epistolar na que carta a carta van desfilando políticos, militares, eruditos y hasta dalguna espía que van narrando “a toru pasáu” les batalles, crisis y amagüestos que foron entamándose en 1809 y que fixeron que’l destín d’Asturies fuere mui estremáu del qu’en verdá tuvo.
La novela, escrita n’asturianu, imita l’estilu de la correspondencia en llingua asturiana que Gaspar Melchor de Xovellanos y otros eruditos y políticos de la dómina escribieron na contienda. Nella, Andrés Fernández domina con soltura’l rexistru del asturianu del sieglu XIX, daqué estremáu del actual. Lleva prólogu del historiador Faustino Zapico y podéis mercala equí abaxo:
