Descripcíon
Nel pueblu de Seloriu organizaron, per primer vez y al más puru estilu de los antiguos trovadores, un festival de poesía oral. Y foi ehí, ente versu y versu, onde Dora, la protagonista d’esta hestoria, se decató de que tien un “don” únicu: el de ser a ver y a oyer falar a la pantasma de Bermudo, ún de los trovadores más importantes que tuviere la Península (o eso diz él) y que, nun se sabe cómo, ta ehí cola so figura espectral y los sos comentarios extemporales en plenu sieglu XXI.
Esta ye la historia de toles antepasaes de Dora, que tien que descubrir l’orixe del secretu familiar, venceyáu a la esistencia de Bermudo y que se remonta hasta la Edá Media.
Con bona prosa y munchu humor, Blanca Fernández Quintana conduznos nuna hestoria familiar bien filada y construyida que podría tar ambientada nel mesmu universu de L’Home les Caparines, la so otra novela.
