L’Horru de Vapor

Engranes, vapor, cables, pistones, tuerques, fábriques, mines, ferrocarriles… L’Asturies decimonónica y industrial tuvo d’esto a esgaya. Sicasí, nun surdió equí una tradición propia de facer ciencia ficción “victoriana”. ¿Y cómo ye esto posible nun país que tien pontes diseñaes por Eiffel, tuvo miles de mineros, más ferrocarril por quilómetru cuadráu que la gran mayoría de países europeos y una montonera fábriques? Pa iguar esto y reparar esta delda col pasáu, llanzamos esti “Horru de Vapor”, el primer númberu d’una coleición d’antoloxíes qu’añu a añu van esbillar lo meyor de la ficción especulativa. Nesti númberu una docena d’autores discurrieron dende’l presente un futuru pa un pasáu que nun esistió. Nestes páxines vais ver mines, carlistes retrofuturistes, pirates del aire, inxenieros mouros, orcos obreros, pegues, baillarines, relós desacompasaos, viaxes nel tiempu, mechas arxentinos, armadures mecániques y unes cuantes llocures más. Toes elles ilustraes pol propagandista “oficial” d’Ediciones Radagast dende Depués d’Ochobre, Xon de la Campa.