Retu Radagast: Balance d’un proyeutu de captación d’autores mozos

Va poco más de trés meses tábemos en marzu y el mundu yera bien distintu a como ye anguaño. Daquella llevábemos namás 13 díes confinaos de los más de trés meses que tuvimos n’estáu d’alarma y nun teníemos nin idea de cuánto diba durar l’andanciu nin el confiniamientu. L’últimu acabó (pel momentu) al otru tovía-y queda (esperemos que poco). Decidimos llanzar un retu el “RetuRadagast40”.

Les cuarentenes yeren de 40 díes y nós calculábemos daquella que díbemos tener que pasar una cantidá asemeyada d’enzarru. Plantegamos el RetuRadagast40 como un proyeutu asemeyáu al NaNoWriMo, el certame añal d’escribir una novela (bona o mala) nel mes de payares. ¿Los oxetivos? Escribir una novela (llarga o curtia) de ciencia ficción, fantasía o cualquier otra de les temátiques que tratamos n’Ediciones Radagast…

¿Qué foi de too aquello? Podría paecer que yeren unes circunstancies ideales pa la escritura: cuarenta díes qu’acaben siendo más (colo que da más tiempu a escribir y a correxir) y, en munchos casos, ERTEs o una reducción del volume de trabayu (y una imposibilidá d’atopar más) que fai posible tener tiempu. Sicasí, les coses nun yeren tan de color de rosa. Nun foron pocos los y les escritores que señalaron el fechu de tener problemes a la hora de concentrase. La situación yera estraordinaria.

Noveles moces d’autores mozos

Con too, cónstanos de polo menos 5 persones que participaron d’un mou o d’otru na ellaboración d’una novela específica pal Retu. Por una u otra razón, munches quedaron ensin acabar, o ensin correxir, pero d’ente toes hebo dos que mos llegaron y una d’elles que tenemos intención d’asoleyar l’añu que vien si too sal bien. Otra de les coses que tuvimos como un pegollu importante a la hora de llanzar esti retu, yera’l sofitar decididamente a los y les autores más mozos. Porque sí, pa falar del #RetuRadagast40 hai que falar de narradores mozos y lliteratura asturiana. Tamién de premios.

Nel sistema lliterariu asturianu nun hai espaciu les más de les veces pa qu’un autor o autora mozu o moza asoleye una novela. La novela ye, hai que lo dicir, “el xéneru prohibíu”. Hai que recordar que namás esisten trés premios n’Asturies, Llión y Miranda (y España, y Portugal, y la Vía Lláctea) que puedan xenerar una novela n’asturianu:

  • El Premiu Asturies Xoven de Narrativa
  • El Premiu de Lliteratura Infantil y Xuvenil Josefa Canellada
  • El Premiu de Novela Xosefa Xovellanos

Con too, hai delles trampes nestos premios. El premiu Asturies Xoven nun ye de novela, sinón de narrativa y nun ye n’asturianu sinón en castellán, asturianu y gallego-asturianu; polo que’l fechu de que tenga ganador o ganadora un añu nun ye garantía de nada. En realidá, que salga d’él una novela n’asturianu ye más esceición que regla, solo pasó una vez: en 2019 nos más de 20 años que tien el premiu. Tolos demás años o bien quedó ermu o bien foi en castellán. El Premiu Josefa Canellada tamién tien la so trampa. Ye verdá que, dacuando, pue haber noveles mui interesantes como Na Ciudá Pantasma de Xulio Arbesú o Invisibles de Lluis Aique Iglesias; pero’l premiu en sigo mesmu ye un “caxón de sastre” nel que compiten coles noveles coses que son difícilmente comparables (y mui necesaries tamién, hai que lo dicir); como los cuentos infantiles pa neños). L’últimu que queda, ye l’únicu que ye xeuninamente de novela n’asturianu… nel mundu enteru. Y, a poco que miremos el palmarés de premiaos, vamos ver que los ganadores – toos d’una calidá altísima – repítense y constituyen un grupu bastante zarráu nel qu’hai xente nuevo, pero paez que namás con cuentagotes.

¿La islla de la novela na mar de la poesía?

Por facer una comparación, d’estos 3 premios de novela n’asturianu (qu’en realidá namás hai ún que teamos 100% seguros que de fallase va danos una novela); nun xéneru tan minoritariu ente los llectores como ye la poesía podemos ver que tenemos toos estos premios que pueden xenerar un poemariu:

  • Premiu Nené Losada Rico
  • Premiu Xuan María Acebal
  • Premiu Teodoro Cuesta
  • Premiu Fernán Coronas
  • Premiu Asturies Xoven de Poesía
  • Premiu de Lliteratura Infantil y Xuvenil Josefa Canellada.

Mientres cada añu tenemos, polo menos, 4 (pudiendo ser, teóricamente, hasta 6) poemarios garantizaos al añu (si nun queda ermu nengún), namás tenemos una novela añal (si nun queda ermu). Anque bien pueden ser 3 nun mundu teóricu y, na realidá, nunca fueron más de 2. ¿Ta emburriándose a la xente mozo a escribir poesía? Sí. ¿Llee la sociedá, en xeneral más poesía que narrativa? Non.

Premios descartaos como vía d’accesu -realista – a asoleyar una novela. ¿Qué-yos queda a los novelistes mozos y moces? La vía editorial. Ta claro que ye posible unviar un manuscritu a una editorial; pero les torgues son munches. El baremu de les sovenciones a la edición nun pon les coses fáciles: Apostar por un nome nuevu ye un error dende un puntu de vista comercial y económicu (les editoriales son empreses) y quieren apostar más por un caballu ganador (aka: Un escritor/a consagráu/ada que venda noveles a centenares) que por un autor mozu. Con too, cónstanos qu’hai editoriales que sí apuesten polos novelistes mozos, pero, como vemos, los problemes son más estructurales.

En primer llugar, nun podemos dexar de llau l’aspeutu sicolóxicu. Presentase a un premiu y perder ye lo más natural (les victories son la esceición); perder un premiu depués de ganar dellos nun supón nengún trauma, perder tolos premios de novela a los que te presentes sí pue selo (Y sí pue facer que muncha xente mui válido, quede pel camín).

En segundu llugar, hai que señalar l’ausencia de los xéneros que, polo xeneral, espierten más amor ente la xente mozo. Les persones que tán nos 20-30 años tienen interés pola ciencia ficción, la lliteratura fantástica, el terror, el misteriu… y munchos otros temes que n’asturianu tán como se diz en francés “aux abonnés absents”. Hai esceiciones, ta claro, y escritores de ciencia ficción de bayurosa y mui interesante producción como Dolfo Camilo… Pero, por desgracia, nun dexen de ser una minoría. La xeneración que creció con Harry Potter nun ye la que más fácil tenga escribir una novela n’asturianu, hai que lo reconocer. Por nun tener fácil, nun tuvo fácil lleer Harry Potter na so propia llingua: Namás ún tornáu (nuna torna muncho meyor que la castellana) y tarde.

La xeneración que vien…

Como diximos, el #RetuRadagast40 valió pa recibir dos noveles, de les que vamos asoleyar una l’añu que vien si too sal bien. Pero nun ye solo recibir dos noveles y asoleyar una; ye tamién saber qu’hai unes cuantes más “en procesu” a les que-yos queda poco p’acabar y qu’anque nun consiguiero l’oxetivu pol que naguaben nesti Retu, tienen avanzao muncho. Eses noveles son noveles de les que nun vamos falar, anque podáis imaxinar yá les temátiques, pero lo que sí que podemos adelantavos ye que poco o nada tienen que ver colo que s’escribió hasta agora y qu’hai una xeneración de xente mozo que nun escribió novela y tien muncho, munchísimo que contar… ¡Y de lo más interesante!

Leave a Comment

La to direición de corréu nun va espublizase. Los campos riquíos márquense con *