L’asturianu ye una llingua minorizada, la lliteratura asturiana ye una lliteratura minorizada y minoritaria, tien pocos llectores, conozse poco, la TPA pasa d’ella, nun tien medios, nun tien el favor de les grandes editoriales… Sí, sí. Eso sabémoslo toos y nun ye nuevo. Pero nun ye d’eso de lo que queremos falar; sinón de la gran paradoxa que vivimos nos últimos años.
Va trés años salió’l “III Estudio Sociolingüístico de Asturias” que ye, si se quier, lo más averao a una radiografía de la situación del nuesu idioma. Dende 1991 vien faciéndose con una metodoloxía asemeyada y con intervalos más bien llargos que mos permiten falar, en términos d’escolarización, d’una xeneración-primaria-ESO (10 años) ente unos y otros pos pasaron 9 años ente’l I y el II y 15 ente’l II y el III. Pero nun tamos equí pa falar de sociollingüística, sinón de lliteratura. O, meyor dicho, de la parte de sociollingüística que tien que ver cola lliteratura. Y lo que vemos ye que’l númberu de persones alfabetizaes n’Asturianu (les que son a escribir y a lleer), nos últimos 15 años, multiplicóse por 3,5; cuasi duplicándose si tenemos en cuenta tanto los que saben lleer y escribir como los que dicen namás saber lleer.
Un saltu como ésti nun lu hebo nunca dende 1991 (nin siquiera dende 1983, si damos por válidos los datos d’aquel estudiu). ¿Cuála ye la paradoxa? La paradoxa ye qu’anque l’Asturies de 2020 ye l’Asturies na que más xente sabe lleer n’asturianu de toles Asturies qu’esistieron… …les cifres de llectura y venta de llibros son les mesmes que va 10 ó 20 años, polo que mos cuenta la xente que lleva más tiempu nesto que nós (que somos unos yogurinos). ¿Por qué pasa esto? ¿Cuáles son les causes que faen que se duplique’l númberu de potenciales llectores y nun lo faiga (nin siquiera en menor midida) el de llectores reales o “compradores de llibros”?
La teoría de Radagast
La nuesa teoría ye clara: La diversidá temática. La lliteratura asturiana, teniendo una calidá altísima y nomes de primer nivel que nada tienen qu’envidiar a los d’otres lliteratures ibériques o europees, nun tien temes que permitan conectar con una bona parte de la sociedá: Nun hai fantasía épica (lo que ye tovía más grave nun país cola bayura mitolóxica que tenemos), nun hai más qu’un escritor de ciencia ficción (tan escelente como solitariu), nun hai terror, nun hai novela romántica, nun hai space opera, nun hai noveles de zombies, nun hai fan fiction nun hai… ¡Tantes coses!
Por eso Radagast parte d’esta teoría: De qu‘hai xente que ye potencial llectora de llibros n’asturianu, potencial compradora de llibros n’asturianu pero nun lo ye en realidá porque la ufierta temática nun-y resulta interesante. Dicho d’otra forma, el “mercáu asturianu” ufierta una serie de productos (como pueden ser los poemarios) que nun son per se, nin meyores nin peores, qu’otros productos que nun ufierta (como los que diximos enantes).
La teoría que tenemos en Radagast ye más amplia: Partimos de la base de que los potenciales compradores de lliteratura asturiana perpasen en muncho al perfil de “asturianista militante” o “miembru de la cultura”. Tamién partimos de la base de que munches de les persones que podríen mercar un llibru n’asturianu – xustamente pola ausencia de perfil militante – podríen guapamente mercalu en castellán si tuvieren les dos opciones.
El “retratu robot” d’esti llector potencial d’una persona que llee más en castellán que n’asturianu, que nun ye militante, que-y interesen unos temes concretos y que-y resulta secundario’l fechu de que tean n’asturianu o castellán; porque esa persona ta buscando eses temátiques concretes y esos productos concretos: Llámense rol, fantástica, ciencia ficción, zombies o xuegos de mesa. Lo único qu’hai que facer ye dá-ylos.
El primer test: Depués d’Ochobre
El primer test a esta teoría foi’l mecenalgu de Depués d’Ochobre. Bien ye verdá que nesta ocasión tratábase d’un productu con edición tanto n’asturianu como en castellán; polo que nun ye xusto apuntar a la lliteratura asturiana tol éxitu d’esti mecenalgu. De los más de 300 llibros vendíos más de 150 fueron n’asturianu. Amás, de los 12.000€ recaldaos, más d’8000 fuéronlo por llibros n’asturianu. L’éxitu de Depués d’Ochobre nun puede atribuyise a nengún otru factor que nun seya la temática. Nun tábemos énte un autor premiáu o conocíu nin énte un dibuxante de renome. Nun mos enquivocamos si afirmamos que la mayoría de les ventes fueron a persones que nun lleeren nin una ringlera de lo qu’escribiere l’autor o que nun vieren más ilustraciones del dibuxante de les qu’ún y otru xubieren a la páxina de Verkami.
Si un xéneru minoritariu y friqui como ye’l rol puede vender 150 llibros y recaldar más de 8.000€: ¿Por qué nun van ser viables otres obres más “comerciales”? Por eso queríemos animate a ti, escritor/a, si te gusten los mundos que trabayamos, a que mos apurras los tos manuscritos. ¡Prometémoste lleelos con procuru y ganes!
